கவிதை— தாருங்களேன்.!

மயிலோடு விளையாடி
மலரோடு கதைப் பேசி
மானோடு நடைப் பழகி
புல்வெளியில் மெத்தையிட்டு
தென்றலைப் போர்வையாக்கி
கானகத்தில் கதையெழுதி
மின்னலைத் தூரிகையாக்கி
மேகத்தில் ஓவியம் தீட்டி
நீர்வீழ்ச்சியில் நீராடி
காட்டுக் கனிகளை உணவாக்கி
இயற்கையே காட்சியாகி
தத்தையிடம் தமிழ் பழகி
காற்றோடு கவிதையெழுதின
என் கைகளுக்கு
கவிதையொன்றும் சிக்கவில்லை?

கெண்டைவிழிக் கண்கள் அழுகின்றன
வெண்பஞ்சு விரல்கள் எழுதுகோல்
பிடிக்க அஞ்சுகின்றன?
சிலந்திவலை சிக்கலுக்குள்
சிக்கிக் கொண்ட மூளை
சிந்திக்க மறுக்கிறது?
எழுச்சிமிகு எண்ணங்கள்
எழுதச் சொல்கின்றன!
ஏனோ என் காகிதத்தில்
எழுத்துக்கள் பதிய மறுக்கின்றன!
வார்த்தைகளே மறந்துபோய்
மண்ணாங்கட்டி ஆகி
மரத்துப்போன என் மனதிற்கு
யாராவது ஒரு கவிதை
தாருங்களேன்…………………….!